L'istorgia da las scolinas rumantschas en il chantun Grischun ha cumenzà l'onn 1945. Da quel temp ha la Lia Rumantscha surpiglià l'iniziativa per las scolinas rumantschas en il chantun Grischun. Adina dapli uffants da lingua rumantscha han  ils proxims onns gì l'occasiun da visitar ina scolina rumantscha. A Cuira han ils uffants rumantschs però gì da mussar  pazienzia anc in ulteriur decenni. Cun agid da la citad da Cuira eri alura l'onn 1955 uschenavant. La Scolina pudeva entrar en la chasa da la Lia Rumantscha.
En il chantun Grischun èn ozendi las vischnancas responsablas per las scolinas. L'excepziun è restada fin oz la Scolina rumantscha. Ella vegn anc adina manada da la Lia Rumantscha.